佢已經算係好幸運﹐除左話無俾人食落肚之外﹐佢曾經試過係屋企露台跌落街﹐個殼裂左﹐但都唔死得﹐又試過係後腳生大瘡﹐大到連行都行唔到﹐但最後又無拿拿好返……但今次佢就挨唔過喇~

其實阿龜由一年前開始對腳行得唔係幾好﹐慢慢就直頭行唔到添﹐起初我地以為佢扭親﹐諗住佢係冬天冬眠既時候可以好好休養下﹐跟住就會好返﹐點知過左個冬天之後﹐都依然係行唔到﹐原本只係前腳唔郁﹐後來慢慢連後腳都唔郁。就算行唔到果時﹐我俾野佢食﹐佢都會食﹐但近期開始唔食喇。

早幾日有個客帶過隻龜黎我地公司都睇﹐又係話著腳有問題﹐之後我就決定帶阿龜返去。一返到去﹐E生都已經話佢個樣好弱﹐跟住話可能係kidney or liver failure﹐但要驗血先知﹐就幫佢打左antibiotics + multivit﹐打完之後過左一陣﹐阿龜開始有呼吸既困難﹐直頭好似人就黎死咁……E生再幫佢睇﹐話佢肺積左好多水﹐好大可能係kidney failure﹐因為D水排唔到﹐跟住幫佢打左支排水針﹐然後同我講其實情況唔樂觀﹐因為佢身體已經好弱﹐成個身無晒muscle﹐淨係得返D皮﹐而且kidney failure係無得E既﹐除左換腎﹐但無可能會同一隻龜換腎囉……那麼講得衰D即係等死~﹗

其實我都有晒心理準備﹐我都話如果我再見到佢咁辛苦﹐我就會同佢PTS﹐但我真係唔捨得﹐我亦做唔出﹐最後我噙晚收工都帶左佢返屋企﹐但我心裡有數佢唔會挨得幾多日﹐因為我帶佢走既時候﹐佢D手腳已經係凍到冰咁﹐但我都希望就算死﹐佢都可以係佢既家度死……

當然最後到今朝﹐阿龜就離開左我地屋企。
我都唔知係咁岩得咁橋﹐抑或我帶佢去睇E生係一個錯﹐原本佢一路都無事﹐係噙日返過公司之後就死左喇……不過可能世事往往就係咁橋。我可以為佢做既我都盡力做左﹐我噙日同個同事用forceps撬開佢個口﹐餵左D貓BB食既糊仔俾佢﹐起碼叫左有D野落過肚﹐就算今日去都唔係餓住個肚仔﹐我亦都俾錢叫人同佢火化﹐仲要返D骨灰﹐我知道佢在生既時候﹐我無為佢做過好多野﹐甚至乎連相我都無同佢影過﹐但你叫我就咁掉左佢﹐或者埋左佢﹐我做唔出﹐話晒十幾年一定有感情。